ورشة الحكى والتصوير والكتابة …

الأربعاء 28  يناير 2015

تدوين: مينا  رجائى

بعد الفطار والفول اللذيذ، بدأنا اليوم الأربع من الورشة 28 يناير 2015 .. بدأ اليوم بدايرة التشيك إن عن توقعاتنا لليوم وورش الحكى والتصوير وكانت اول ورشة للأستاذ حسن مؤسس فرقة الورشة المسرحية وتامر مخرج الأفلام  الوثائقية عن الحكى ودوره فى التوثيق والتصوير .. أهم القواعج كانت “نحكى ولا نشرح” و “تواصل العين يعنى انا أتواصل” وحكت شمس أول حكاية عن فكرة شغلاها وهى غشاء البكارة وبعها مينا (اللى هو انا) حكى حكاية شخصية عن جده وعلاقته به بس الأتنين وقعوا فى نفس الغلطة وشرحوا بس فى الآخر وده اللى علق عليها حسن وتامر. بعد انتهاء اول تدريب ابتدا الغدا وبعده كانت ورشة الكتابة اللى قدمتها “قسمة”. إتقسمنا اربع مجموعات عشان نكتب شهادات لأحداث مختلفة اولها كانت شهاده جندى أمن مركزى فى ثورة 25 يناير وقلتها انا فى الآخر. بعدها تانى مجموعة عن شهادة جندى انجليزى فى 56 كان موجود فى بورسعيد والمجموعة خلته يكتب جواب لحبيبته آن وحكتها يمنى ونيرة .. والمجموعة التالتة لعامل نوبى كان شغال فى بنا السد العالى وحكاها عمرو. وأخيرا المجموعة الرابعة اللى اتكلمت عن شهادة موظف إنجليزى فى بنك فى القاهرة اثناء حريق القاهرة فى 26 يناير 1952 وحكاها مصطفى .. وبعدها بدأنا نعلق على كا شهادة وطريقة عرضها ومحتواها وكان النقاش مفيد جدا والكل استفاد من ورشة الكتابة اللى ادارتها قسمة .. فى الآخر وزى كل يوم عملنا دايرة “التشيك اوت” والكل اتكلم ازاى استفاد من اليوم ومن ورشة حسن وتامر وقسمة ثم بدأ العشا وبعدها حضر “زيزو” المطرب النوبى ومعاه العود وبقية الفرقة حوالى 8 أشخاص بدف وطبلة وغنوا مجموعة كبيرة من أغانى النوبة والسد والتهجير وبدأ معظم الحاضرين فى الرقص على الطريقة النوبية والكل كان فرحان ومستمتع .. ليلة جميلة من ليالى الورشة وفى آخر اليوم الكل راح ينام عشان يستعد ليوم جديد مليان شغل وإستفادة .. وإحكى يا تاريخ.

تدوين يوم الثلاثاء (27/1/2015 ) من ورشة احكي يا تاريخ

الثلاثاء 27 يناير 2015

تدوين: شمس (شيماء حجازي) وبوش عادل 

DSC08746

التدوين هايكون بطريقه مختلفه شويه  أو ممكن نقول طريقتين أنا (شمس ) دونت بطريقة (هو انا كان نفسي يكون حكايات بس طلع عباره عن انطباعات  المشاركين / المشاركات عن اليوم ) وبووش رفيقي في التدوين اليوم ده دون بطريقة  (التقارير أو ممكن نقول اختصرالكلام  في نقط ) …

كلام شمس  (أنا ) :

طيب اليوم كان عباره عن  جلستين الجلسه الأولى كانت عن الويكيبيديا , انا شخصيا ماكنتش أعرف حاجه عنها وإتعلمت كتير بغض النظر عن  إننا عملنا عرض باوربوينت في الشمس عادي جدا J , كان شكل السيشن هايكون مختلف لو كان في إنترنت أكيد وقدرنا نشتغل عملي , الجلسه التانيه كانت رائعه جدا المكان كان عظيم طبعا بغض النظر برضو عن اننا ابتدينا السيشن بمحاولة انقاذ كارول من الغرس في الوحل J , بس عجبتني طريقة نيرمين وكانت حاجه جديده وفعلا خلتني أرتب أفكاري جدا , البريك كان لطيف جدا وأنا شخصيا انبسطت جدا بالكلام مع حسن وتامر في البريك J  وطبعا هو بالنسبه لي أنا وبوش ماكنش بريك أووي علشان كنا بنجمع تدوينات الناس بس كده J .

كلام أحمد الأمير :

اليوم كان تكمله مهمه للأيام اللي فاتت وإننا كنا نسينا اللي اتحكى وإننا أعدنا السرد تاني من خلال جلسة نيرمين فا ده أكد على الحاجات  لإن الورشة 10 أيام , ده اختيار سليم لإننا لازم نأكد على الحاجه مره واتنين , في خيط تاني أكيد هايوصلنا لإننا نكتب تصور ونحكي , وكمان جلسة نيرمين كان فيها الحاجات الصغيرة اللي تاهت في الزحمة وأنا (شمس ) ومريم كنا مسجلينها , وبدأنا كمان ندخل في قصة البرمجة (ويكبيديا )  واننا ممكن نكتب أي حاجه ماتنجحش فا نعيد تاني  وننجح , وكمان دي شغلتنا نعمل حاجه تبقى موجوده ولا تتأكل , وإن ده كان من أهم الأيام في الكام يوم اللي فاتت .

كلام عمرو :

بصراحه عجبتني فكرة الخريطه اللي عملتها نيرمين وده هيساعدني بعد كده في شغلي هايختصر جهد وأفكار كتير , ان شغلي ممكن أرسمه على خريطه  بحيث إني أربط الأحداث بالزمن  والتغير اللي حصل في كل زمان وأقارنه بالزمن اللي قبله  علشان أعرف أيه الفروق اللي حصلت .

كلام نيرمين :

بصراحه اللي عملته النهارده تجربه للطريقه اللي باستخدمها علشان أعمل بحث فا هاشوف الناس التانيه هاتعرف تستخدمها ولا لأ , وهاتنجح ولا لأ …. عجبني جدا الصبح (ويكبيديا ) لانو قريب جداا من بحثي  لانو بيغطي الجزء التقني وانا باغطي الجزء البحثي , انا حاسه كمان انو الافكار كلها عماله تطلع والخطوط بتتتوصل وده بيخلق شجره بيخلق شبكه وده خطر شويه , بيخلي في قدره انو الواحد يحدد هدفه من البحث يتاعه وخريطة طريق لـ هو عايز يوصل لأيه .

كلام صفاء :

عن أول محاضره بصراحه ماكنش عندي فكره أوي عن الويكيبيديا إزاي بتشتغل كنت فاكره ان الموضوع مفتوح وماكنش في ثقه خالص في الموقع ده بس فهمت ان الموضوع مقفول وله قيود وانو ظريف , كان في معلومات كتير في الجلسه وكان المفروض نشتغل عملي أكتر من النظري , تاني محاضره القعده تحت حلوه  واننا جمعنا الكام يوم اللي فاتو وحاولنا اننا ناخد الحاجات اللي ممكن نشتغل عليها وكنا بنكمل بعض كل واحد كان شايف الموضوع من وجهة نظره وده خلانا نكمل بعض .

كلام أحمد الجيزي :

اليوم النهارده كنت مكسل جدا وصاحي بالعافيه أول اليوم المكان كان غير مريح والجو حر , الجلسه كانت هاتكون أحلى لو كان في نت وعملنا أكونت بايدينا وغيرنا وعملنا الحاجات كلها بنفسنا أحسن من الكلام النظري , الجلسه التانيه كنت متخيل ان الخرايط مالهاش لازمه بس بعد القعده لاقيت ان الموضوع حلو وانو طلعنا بالأفكار اللي كل واحد فينا مركز عليها , من أول ما جيت بفكر في اللي بعد الورشه فا هل هنا هاتعلم حاجه هاعرف أعملها بعد كده , او هاعرف حد يساعدني في حاجه نعملها بعد كده , الفتره الجايه في الورشه الورشتين اللي جايين الحكي والتصوير هيساعدوني اني احدد الطريقه اللي هاقرر أوثق بيها التاريخ أو هاتجه للكتابات الأكاديميه تاني .

كلام أمين أسامه : (أمين قرر انو علشان يحكيلي هايتكلم عن الورشه من اول يوم J )

بصي هو انا استمتعت جدا د/زينب أول يوم وعرفت حاجات كتير عن بلدي قنا والنضال ماكنتش اعرفها , د/ زينب بتطب قاعدة انو التاريخ مش تاريخ ملوك وانو تاريخ شعوب وانا ماكنتش اعرف التاريخ غير تاريخ الملوك والحكام وماكنش في أي ذكر أو اشاره عن الناس بيعملو ايه , استمتعت بالزياره لـ عنيبه حسيت لما كنت باسمع أ/سليمان بيتكلم عن النوبه القديمه ورحلة التهجير انو فيلم بيتعرض قدامي رغم اني ماشوفتش الكلام ده ولا عندي ولا عند حد قريبي نوبي , حسيت انو قد ايه الناس دووول عانو والحكومه ظلمتهم , كان عندي فضول كبير جدا اني اسمع اغاني نوبيه واعرف مين كان بيغني عن النوبه والسد , واعرف انطباع اهالي النوبه دلوقتي عن السد .

النهارده كانت تكملة للورشه يعني انا مهتم بالتاريخ عموما وباالأدب كمان , المفروض يكون في وسيله لنشر الكلام ده , أحمد غربيه قدلنا مصادر كويسه نروحلها ونقرأ ومدى مصداقية المصادر واني اروح للمراجع واقرا ,أهم حاجه احمد علمهالي ازاي اقدر اعدل المعلومات اللي شايفها غلط في ويكبيديا , وعرفني اكتر انو لازم يكون عندي مراجع موثوق فيها اكتبها , من امبارح وانا حاسس ان المجموعه بقيت في حاله من التجانس الرهيب ودي حاجه كويسه ناخد خبرات بعض ويكون بعد الورشه بينا ذكريات حلوه وحاجات مشتركه نقدر نعملها .

كلام يسرا : (كانت حاسه بصداع كبير ومش عايزه تحكي معانا )

النهارده أأأأأ … بالنسبه للويكبيديا كنت باستعملها استعمال سطحي وكنت بابقى واثقه في المعلومات اللي باخدها منها علشان كنت شايفه الناس اللي ماسكه الموقع عندها مسؤليه , الجلسه النهارده زودت الثقه لانو الدكاتره في الكليه بيسقطونا في ابحاث لو عرفو انها من ويكبيديا , عرفت معلومات تانيه عن ويكبيديا زي (صفحة المناقشه , ممكن نحذف حاجه في الصفح هازاي ) غير كده كنت عارفه معظم الحاجات اللي اتقالت النهارده عن ويكيبيديا ,ضافتلي انو اني ممكن انا نفسي أحاول اشيف حاجه للناس ومعلومات من خلال ويكبيديا لو موضوع موجود على ويكبيديا او اعمل مقاله جديده حتى وكنت قبل كده يادوب باصلح بس .

محضرتش العصف الذهني J جلسة نيرمين .

ودلوقتي مصدعه في البريك ومش عارفه استمتع بيه خالص .

كلام يمنى :

هو موضوع الويكبيديا حاجات كتير اول مره اعرفها  اتعلمت منه كتير لاني كنت بدور على اني أوثق على ويكيبيديا  واتعلمت ده  , خريطة الأفكار مهمه علشان الواحد رتب دماغه والحاجات اللي ماكنتش منوره تنور واللي منور يبان اكتر .

كلام كارول :

استفدت كتير جدا كنت متخيله اني اعرف كتير عن السوشيال ميديا بس عرفت كتير واستفدت كتير جدا عرفت حاجات جديده بالرغم من اني واخده تدريبات كتير في السوشيال ميديا ونت بدرسها كمان بس عرفت جديد .

كلام مينا :

سيشن الويكيبيديا كانت جميله جدا واستفدت منها كتير كانت حاجات كتير اول مره اعرفها , ازاي اعملأكونت ازاي اصلح أو احذف , عجبني اسلوب احمد وانو متعرب ومش بيحط مصطلحات انجليش في كلامه …. مااستفدتش حاجه من سيشن العصف الذهني , البريك جميل مستمتع بالكلام مع حسن وتامر وأكلنا شيكولاته .

كلام جهاد:

الويكبيديا ماكنتش باثق فيها بس حسيتها فكره ظريفه انك تدخل تكتب عن معلومه وتصلحها وكده وتتناقش , واننا عرفنا مكونات الويكبيديا واستخدامات كل حاجه فيها … فكرة العصف الذهني كانت كويسه حددت أفكاري شويه .

كلام تامر :

قالي انو جه في نص اليوم ومش مكون إنطباع أووي بس ممكن يقول : في طاقه إيجابيه كبيره موجوده في المكان  ونفسي الناس تكمل مع بعض وانو الموضوع مايقفش .

كلام ميدو :

السيشن الأولى ماكنتش مركز أو المكان ماكنش مساعدني اني افهم والانترنت كمان ماكنش مساعدنا , دي كانت مرحله اخيره من اني افهم ازاي اقدر اغير في التاريخ لو مكتوب غلط على الانترنت , بالتوالي مع د/زينب ابو المجد – لورشة الجرايد – للعماره  , ازاي استخدم كل الورش اني أقدر اغير حاجه كانت مكتوبه بشكل مش صحيح , ازاي اقدر اساعد المجتمع الالكتروني اني احاول ابينلهم وجهة النظر الصحيحه , احمد شخصيه جميله لطيف جدا هو ومراته وعياله J , السيشن التانيه كانت غريبه كانت وسط الروث J وابتديت دايه غريبه J بس فكرة تكوين المثلثات وتحديد الاحداثيات تقدر تساعدنا اننا نمسك السرديه كويس , ده غير انو نرمين كانت اول مره تعمل كده اعتقد انها نجحت , اتمنى ورشة بكره وبعده نقدر نكمل اللي بنعمله .

تقرير بوووش عن يوم الثلاثاء (27/1/2015 ) من ورشة احكي يا تاريخ في نقاط :

الجلسه الأولى  :

ويكيبيديا – أحمد غربيه .

بدأت الجلسه بتعريف أحمد لنفسه والحديث عن بعض التعليقات بخصوص بعض من صور من المتحف النوبي الذي تمت زيارته في اليوم السابق وتحدث عن فكرة الأخطاء اللغويه ومعاني بعض  المصطلحات وماتشير اليه , وهذا ماتم فهمه من الجلسه من خلال أراء المشاركين / المشاراكات :

  • الجزء التقني والتوثيق على ويكبيديا مهم جدا .
  • زيادة الثقه في ويكيبيديا .
  • فهم القيود المؤشره على المصداقيه .
  • عدم العمل بشكل عملي على ويكبيديا بسبب ضعف الانترنت .
  • معرفة المصادر ومعرفة مدى امكانية الثقه بها .
  • معرفة طريقة التعديل في ويكبيديا .
  • معرفهة أهمية المراجع .
  • معرفة كيفية حذف المعلومات الخاطئه .
  • معرفة وجود صفحات للمناقشة على مقالات ويكبيديا وكيفيفة الوصول اليها .
  • معرفة وجود إمكانية حذف صفحة ما بشروط معينه .
  • معرفة قواعد ويكيبيدا ومن يضعها .
  • معرفة امكانية حذف معلومات خاطئه من ويكبيديا .
  • عمل حسابات على ويكبيديا .
  • مساعدة المجتمع الالكتروني .
  • اسلوب المدرب سهل ومهتم بتعريب المصطلحات .

الجلسة الثانية :

خريطة الأفكار – نيرمين عصام

بدأت الجلسة بشرح نيرمين للفكره وهي عمل احداثيات عباره عن الفتره الزمنيه اللتي تم بها الأحداث والموضوعات المراد الشغل عليها من قبل المتدربين/ات والعلاقات بينهما .

  • خريطة الأفكار ترتيب الأفكار وخلق مساحات فكر جديده .
  • رؤية أفكار المشاركين لبعضهم .
  • تنوع الأفكار وتوسيع مدى الرؤيه .
  • العصف الذهني واسترجاع المعلومات وتثبيت المعلومات.
  • خريطة الأفكار ورسم خارطة طريق .

الجلسة الثالثه :  أجازه

زيادة حالة التجانس والإندماج بين المشاركين /ات .

اجازه في وقت جيد والاستفاده بالحديث الحر مع المدربين /ات.

فى بلاد الجمال ربانى .. النوبة ..

الجمعة 25 يناير 2015

تدوين: ياسمين بيومى 

DSC00917

تشرق شمس صباح الاثنين الموافق 26/1/2015 … القرية هادئة جدا تسمع فقط صوت المياه التى تحركها الرياح لتدابع الاحجار على الشاطئ .. يستعد فريق ورشة احكى يا تاريخ لتناول وجبه الفطور .. احدهم يستيقظ ويتفقد جهازه المحمول والشبكة ضعيفة .. الاخر يستمع اللى بعض الموسيقى على جهاز الكمبيوتر الخاص به فى فناء المنزل .. وبعضهم مازال فى غياب تام مع الاحلام التى تراوده .. وكلا منا فى ملكوته ..

 الساعة التاسعه.. يظهر صوت تلامس اكواب الزجاج الفراغة .. ويبدأ الجميع فى الحضور حول الطاولة المستطيلة لتناول الفطور .. تبدأ الاصوات تتضارب ..صباح الخير واصوات حركة الاقدام على الحصى الصغير الذى يغطى فناء المنزل الذى نقيم فيه “بيت سهيل ” .. وافكار جديده تناقش مخزون ليله امس .. و”هبة “الصحفية من جريدة المصرى اليوم تريد ان تسجل مع مصطفى .. ويبدأ اصحاب بيت سهيل فى حوالى الساعة العاشرة الا ربع فى وضع اطباق الفول والشكشوكة والخبز والمربى والجبن على الطوالة .. فينتظم الجميع .. .. ضحكات وكلام غير مفهوم .. اصوات غير مسموعة فى حديث جانبى .. ابتسامات .. يطلبون خبز واقرر ان استعد ليوم العمارة والعمران بادارة يحيى شوكت .. المهندس المعمارى .. اتجه الى غرفتى وافرغ الكاميرا للحصول على ذاكرة فارغة لاستعد واحضر اوراقى .. نتحرك الى بيت قريب لنبدأ المحاضرة .. اثناء السير نكمل ما لم نكمله بالامس .. رمال وطريق غير ممهد النيل والصخور .. اطفال القرية وابتسماتهم .. نصل الى غرفة المحاضرات .. نقف جميعا فى دائرة ونمارس اليوجا بقياده عليا .. يدور فى عقلنا جميعا قصص مختلفة .. لا نسمع ولا نرى ولا نتكلم .. الهدف من اليوجا هو استحضار روحك فى ثوبا جديد .. تقول نيرة : كل واحد يقول لون بيعبر عنه .. تتضارب الالوان بين الاصفر والبرتقالى والشفاف والازرق والرمادى والابيض والاسود .. نبدأ محاضرة يحيى ..  صورة حسن فتحى .. هل كان حسن فتحى يريد توثيق العمارة النوبية ؟؟ .. حسن فتحى رائد العمارة البيئيه واستعان ببعض المفردات من العمارة النوبية بحكم ان هذه العمارة نشأت وسط طبيعة بيئيه قاسية .. استشهد يحيى ببعض الصور لنماذج للبيوت النوبية .. المساقط الافقية والوجهات وايضا نموذج البيت النوبى الذى عرضه علينا عم محمود عندما ذهبنا فى زيارة لمدن التهجير اول امس .. اتتقل يحيى الى علاقة التاريخ بالعمارة ..من الممكن ان نجد ما هو مكتوب لنعود بالزمان الى 120 سنة ولكن عندما نريد ان نعود الى ما ابعد من ذلك سنجد ان العمارة تعود بنا الى 7000 سنة تقريبا .. والمدفون يعود بنا الى ابعد .. بدأ يحيى فى شرح العلاقة التى تجمع العمارة والحفريات والتاريخ وشاهدنا بعض الصور التى تخص حفريات ومناطق تقوم بعض البعثات بالحفر بها حتى تكتب التاريخ من جديد .. انتقلنا من عالم المدفون الى عجيبة من عجائب الدنيا ” الاهرمات ” اسرار الاهرمات واشار يحيى الى انه يوجد 10 اهرمات فى منظقة الجيزة حيث يوجد لكل هرم رئيسى ثلاث اهرمات ومعبد بخلاف الهرم الاوسط الذى يوجد جانبه هرم واحد فقط و3 حفر على شكل المراكب الشمسيه ويوجد خلفه بعض الغرف للحرفين … وبدأت الافكار تتضارب عن تاريخ هذا الصرح وبدأ يحيى فى تحليل صورة لمدينة تحيطها المياه من كل جانب وتظهر الاهرمات فى الخلفية وكيف نستطيع حساب فى اى وقت التقطت هذه الصورة من خلال بعض المحددات الجغرافية والتقنية .. وقت كوب الشاى حيث نبدأ فى تركيز المعلومات وعمل اعاده تشغيل سريع لاجهزة الاستيعاب فى داخل كل منا .. استكمل يحيى المحاضرة بشرح تحليلي لمنطقة اهرمات الجيزة والهضبه قبل بناء الاهرمات ..ومررنا سريعا على التاريخ الجيولوجى واستفاض يحيى فى شرح التاريخ الكونى والعلاقات الهندسية وشرح مثال لمبعد سيتى ومعبد اوزرين فى سوهاج وشرح فرق المنسوب فى القطاع الرأسى والمسقط الافقى .. ثم انتقل بنا يحيى الى معبد ابو سمبل ورواية التعامد والعلاقة بين التاريخ الكونى وبناء المعابد المصرية والفصول كما كانت عند المصرين الفيضان والزراعة والحصاد .. وهنا توقف يحيى بعد رسم شكل توضيحى يوضح تواريخ التعامد وهو ما يقسم العام الى 3 فصول .. اتجهنا بعدها الى المركب .. تحركنا على مجموعات ذهب بعضنا الى غرفته ليبدل ملابسه او ليستعد لليوم .. وتحرك المركب بعد اكتمال العدد فى حوالى الساعة الثانية الا ربع .. وتوقفنا قليلا لنرحب باحمد غربيه وزوجته واولاده الذين انضموا الى الورشة جديدا .. مياه النيل الصافيه احيت ذكرى فى كل قلب منا .. استوعب الجميع ان عليه ان ياخذ استراحة .. وعند مرسى معبد اسوان نزلنا جمعيا فى هذا المكان الذى يحكى قصص كثيرة وينير فى داخلك غرف جديدة لتبدأ عملية البحث , فعندما ترى التدرج فى طبقات هذا المكان وكيف تم بناء مدن فوق مدن وشوارع فوق شوارع ومعابد فوق معابد تدرك ان العمارة والعمران احد اهم الوسائل التى تحكى القصة بشكل مختلف ومنظور مختلف .. تتبع خطوات غيرك لتبحر فى عالم جديد وتصلى نفس الصلوات وتخشع وتقدس الحجارة وتتلو كلمات غير مفهومة وتتعلم من جديد فيتسلل الى قلبك ايمان جديد وتبدأ فى البحث عن مالم يكتبه التاريخ .. يحتوى المعبد ايضا بعض الاماكن المرممه وطرق مختلفة فى الترميم .. المعبد كان موجود فى مصر الفرعونية ومن ثم البطالمه اقامو مبانى فوقه .. وتحمل الاحجار اسماء من لم يكتب عنهم التاريخ .. تحرك الجميع الى المركب واتجهنا الى المطعم تناولنا الغداء فى حوالى الساعة الرابعة ونصف وبعد الغداء اجتمع فريق الورشة لتناول الشاى وبدأت الاغانى تخرج من اعماق كل منا بعشوائية وبدون ترتيب .. تصالح الجميع مع نفسه واصفح عن مشاعره ..توجهنا مسرعين الى متحف النوبة قبل ان يغلق .. وصلنا الى المتحف وانقسمنا الى مجموعات .. داخل المتحف تجد محاكاه تاريخ النوبة وتسلسل الحضارات .. تفاصيل التماثيل والدقة فى صناعتها بدأ يحكى قصص كثيرة ويفتح غرف جديدة .. الادوات والاسلحة والملابس واشكال المعابد والبيوت والمقابر كل هذه الاشياء كانت تتوج حكاية فى نمط مختلف اجتماعيا وسياسيا وعقائديا .. انتظرنا خارج المتحف حتى اكتمل العدد وبدأنا فى عمل دائرة جديدة حتى نقول اغنية تعبر عن كل منا .. وانتهى اليوم وتفرقنا وذهب كل منا الى البيت بطريقته واخذ معه صفحة بداية لتكون مقدمة فى بحث جديد ورحلة جديدة وتجربة جديدة داخل صفحات حكاية تاريخية جديدة ..

يوم التاريخ الشفهي

السبت 24  يناير 2015

تدوين: أحمد الجيزى 

حماس كبير بدأ بيه اليوم و بعد يوم أكاديمي في غاية الأهمية من د زينب أبو المجد جه يوم الحكي و التاريخ الشفهي اليوم اللي موضوعه كان سبب إن كتيير يسعى يحضر الورشة كلها J

اليوم إنقسم لمرحلتين الأولى محاضرة ل د عليا مسلم عن مصادر التاريخ و كيفية إدارة مقابلات التاريخ الشفهي
و كان الجزء الثاني تطبيقا عمليا من خلال زيارة لقرى النوبة المهجرة في كوم أمبو و حديث مع أهلها
أما عن المحاضرة
فبدأت بعرض مشاهد من فيلم تسجيلي عن مظاهرات عام 1951 في القاهرة و الإسكندرية داعمة للفدائيين في منطقة القناة و حربهم ضد الإحتلال البريطاني و المسيرات شهدت مشاركة رجال دين و طلبة و بعض الجاليات الاجنبية من الموجودين في مصر مثل ( الباكستانية و السعودية و اليونانية ) و هتافات و لافتات مثل ” اخرجوا من بلادنا “و قبل ما ننبهر بالنظام و السلمية الموجود عليها المظاهرات بادرتنا د عليا بذكر إن مش كل المظاهرات كانت على هذا الحال و شهدت كتير منها أحداث عنف و إشتباكات .
و تطرح د عليا سؤال عن ” مين كتب الأغاني ” و ” مين غنى الأغاني ” هنا الكلام عن أغاني الأهالي في البيوت و الشوارع أغاني من تأليف الأهالي و حافظينها و بيغنوها في إحتفالاتهم أو احزانهم و السؤال هل فعلا الأغاني اللي موجودة حاليا هى سردية الأهالي لأحداث عاصروها و بقت مع الزمن أم تم تعديلها و هل تأثرت تلك الأغاني بسردية الدولة الرسمية عن التاريخ أم حكت سردية الأهالي و ما شاهدوه و عاصروه  بمنظورهم عنها و ننتقل لفرضية ” جرامشي ” عن ”    ” common sense و إن أحيانا سردية الدولة تصبح هى نفسها شعور عام يأثر على سردية الأهالي و تتحول سرديتهم لسردية الدولة نفسها و تتطابق معها لدرجة إن مثلا أغاني لعبد الحليم حافظ عن مشروع السد العالي و ما تمثله من رؤية الدولة الرسمية وقتها ترجمت للنوبية و غناها أهلها.
الروايات الرسمية بتختلف أحيانا بشكل كبير عن روايات الأهالي المعاصرين لكن أبعد من ذلك أهالي مدن لديهم سردية و مشاهد خاصة بهم عن الحروب مختلفة تماما عن سردية الدولة الرسمية أو الصورة العامة للذهنية الموجودة عند باقي أهالي الدولة مثال على ذلك مشهد الجنود المصريين العائدين من سيناء منكسي الرؤوس عقب نكسة 67 يراه عموم المصريين رمزا للهزيمة و النكسة في حين يمجد أهالي السويس هؤلاء الجنود و يصفونهم بالأبطال لنجاحهم في الهروب من القتل أو الأسر و العودة سالمين من سيناء و يشهد على ذلك أغنية “الفاتحة للعسكري” و اللي إتغنت خصيصا دعما لهؤلاء الجنود..
مرينا في المحاضرة على أمثلة لأغاني المقاومة الشعبية في السويس في حرب أكتوبر و كمان ” الإلمبي” الحدث الشعبي السنوي اللي بيقام في بورسعيد و حرق الدمية اللي بترمز للإستعمار و عرفنا الذاكرة الشعبية .
سمعنا أغنية ” زي النهارده من 50 سنة ” اللي غنتها السمسمية البورسعيدية في ذكرى مرور 50 سنة على تأميم قناة السويس و شوفنا تطابق الأغنية مع سردية الدولة التاريخية للحدث و التمجيد في ناصر و عرفنا إن لحن الأغنية نفسه كان أساسا من أغنية عملها الأهالي لبطل مصري بيحارب في العراق إسمه لطفي البربري و إتحولت لزي النهارده.
شوفنا كمان كيف تصنع الدولة مجدها و مجد حكامها بتسليط الضوء على حكايات بعينها من حكايات المقاومة الشعبية و تضخيمها و تهميش البقية كون هذة الأحداث إرتبطت بشكل مباشر برموز الدولة و قادتها مثل زينب الكفراوي و محمد مهران من المقاومة الشعبية في بورسعيد 56 ..
إنتقلنا للجنوب و مراحل تهجير أهالي النوبة بداية من تهجير خزان أسوان و نهاية بالتهجير الأكبر لبناء السد العالي في عام 1963و عرفنا كيف نجحت الدولة في إقناع النوبيين بأفضلية التهجير لهم حيث الإنتقال للمدنية الحديثة و الكهرباء و صدمة الأهالي بعد ذلك و معاناتهم الشديدة في كوم أمبو و ندمهم على التهجير و ترك بلادهم و بنشوف ده في أغاني كتير سواء حزينة للتهجير و فقدان بلدهم ” قالوا كوم أمبو الجنة الخضراء .. روحنا لقينا جهنم حمراء ” أو بتهاجم السد العالي و بناءه مثل واحنيناه بالنوبية الفاجيكية .

إتكلمنا أكثر عن عملية بناء السد العالي نفسه ووصف الدولة الرسمي للعمال ببناه السد كتعظيم ليهم وإنهم مش مجرد عمال و إنه كان شئ مؤقت و بنهاية بناء السد إتنسى الوصف عرفنا حكاية ” المرحوم كان غلطان” العبارة اللي كانت بتكتب على نعوش ضحايا العمل في بناء السد العالي حتى لا يطالب أهله بتعويض!

قبل ما ننتقل للجزء الثاني من اليوم عرفنا مجموعة من النصائح عن كيفية إدارة مقابلات التاريخ الشفهي مثل الإنصات الجيد و تحديد الأسئلة مسبقا و أهمية فترات الصمت و عدم قطعها و إحترام خصوصية الحكاء و أخذ موافقة شفهية أو كتابية بالموافقة على التسجيل و أخذ المعلومة الواحدة من أكثر من شخص لتأكيد تطابق الرواية و من ثم صحة المعلومة ..

تركنا جزيرة سهيل النوبية عبرنا النيل و ركبنا العربيات باتجاه قرية عنيبة في صحراء كوم أمبو و إتحولت كلمات التاريخ اللي سمعناه في المحاضرة لمشاهد و أصوات و صور حقيقية شوفناها في الواقع فإنتقلنا من مشهد النيل الساحر و الخضرة حوله المشهد اللي طالما بكى أهل قرى النوبة المهجره مثل عنيبة على فراقه إلى مشهد بعيد تماما عن النيل و طقس صحراوي و درجة حرارة عالية عندما وصلنا لعنيبة الجديدة في صحراء كوم أمبو ..

إستقبلنا الأهالي هناك بترحاب شديد و دعونا للغذاء معهم على مائدة طويلة من الطعام مرتبة بنظام شديد ملفت يعبر عن كون النظام و الترتيب و النظافة سمة أساسية لأهل النوبة و كلمنا عم محمود عن النوبة و السد العالي و التهجير بشكل عام قبل ما نتفسم لثلاث مجموعات كل مجموعة تقوم بعمل مقابلة تاريخ شفهي مع أحد أهالي النوبة مجموعة كانت مع عم محمود و مجموعة مع أ سليمان و مجموعة أخيرة مع نساء من أهل النوبة حدثونا جميعا عن مشروعهم الجديد ببناء مركز للتراث النوبي لتوعية أطفال النوبة ممن لم يعاصروا التهجير أو يشوفوا النوبة القديمة بتاريخ النوبيين و عاداتهم و تقاليدهم و إن يكون مركز التراث نفسه مقاما على الطراز النوبي بدون أي تحريف أو تغيير و إن الطراز المعماري الدارج حاليا وصفه بإنه نوبي به أخطاء كثيرة و إن المتحف النوبي نفسه اللي أقامته الدولة في أسوان أيضا به أخطاء لذا فإن مركز التراث سيكون شئ ضروري جدا لأهالي النوبة أنفسهم و كل المهتمين بالنوبة و الراغبين في التعرف على ثقافتها و حضارتها ..
كل مجموعة سألت كل شخص عن إزاي عاصر فترة التهجير و آثارها على المستوى الشخصي و الإجتماعي و الإقتصادي و كل نواحي الحياة تقريبا و أشكال معاناتهم المختلفة و كمان عن رغبتهم المستمرة في العودة و مفاوضاتهم مع الدولة على مدار الأزمنة المختلفة كلمونا عن طباعهم و عاداتهم و تقاليدهم بالتفصيل و كانوا متحمسين جدا و كنا نحن سعداء و سجلت كل مجموعة جلستها كاملة ..
عدنا لأسوان و من بعدها لجزيرة سهيل ..إنتهى اليوم لكن الحماس مستمر من كل المجموعات عشان تلخص مقابلتها و تعرض على المجموعات الأخرى تجربتها و نتبادل الإستفادة صباح الغد إن شاء الله

صور 

كلام في التاريخ

الجمعة 23 يناير 2015 

تدوين : أمين أسامة – مريم دهب – بوش  عادل

DSC00867

الخطة الزمنية لليوم :

1- قعدة تعارف مع د/ زينب أبو المجد (دكتورة في تاريخ الشرق الأوسط في جامعة أوبرلين في اوهايو في الولايات المتحدة وأستاذ زائر بالجامعة الأمريكية بالقاهرة).

2 – اول وجبة الفطار 9- 10 صباحاً.

3- وصول أعضاء الورشة إلي قاعة المحاضرات ومحاضرة بعنوان ( التاريخ الاقتصادي الاجتماعي للفئات المهمشة  بصعيد مصر ) للدكتورة زينب أبو المجد الفنرة الاولى  من الساعة 10 إلي 12

4-عرض فيديو عن يوم وصول مشتركي الورشة ( إعداد يمنى الختام و محمد دسا).

5- استراحة لصلاة الجمعة.

6-استكمال المحاضرة ( فترة ثانية ) من الساعة 1 إلي 2:40

7-تناول الغداء.

8- استكمال المحاضرة ( فترة الثالثة ) من الساعة 4 إلي 7

9-  تناول وجبة العشاء.

…………………………………………………………………………………………………….

تناولت المحاضرة الحديث عن أنواع التاريخ ( تاريخ كلاسيكي –تاريخ حديث).

أولا التاريخ الكلاسيكي : يتمثل في فتوحات الملوك والرسل

وتطرقت د. زينب للحديث عن مصادر التاريخ التي يمكن الاطلاع عليها ومن أهمها :

  • خطط المقريزي والجبرتي و خطط علي مبارك, كتب الطبقات , مقدمة ابن خلدون,مثال : كتاب الطبقات الكبرى لابن سعد.

وقد أشارت أن كافة المؤرخين العرب قد انحازوا لتاريخ الملوك والحكام والأحداث السياسية الهامة دون النظر لتاريخ الشعوب.

ثانيا  :التاريخ الحديث: ( القرن التاسع عشر والعشرون الميلادي )

الحديث عن تاريخ الدول القومية والدول ذات الحدود والتي تتمتع بلغة واحدة ورئيس واحد.

  • عرض فيديو عن يوم وصول المشتركين لبيت سهيل

———————————————————————————————–

 ( طرق كتابة التاريخ ) :

أولا التاريخ الكلاسيكي : كان التاريخ الكلاسيكي يتم جمعه وتدوينه عن طريق روايات شفهية موثوق فيها من قبل علماء وفقهاء. ولم يعتمد على نصوص موثقة.

ثانيا التاريخ الحديث : لا يمكن كتابة تاريخ حديث بدون وثائق.

مصادر التاريخ الحديث :

  1. وثائق وقرارات رسمية : لكتابة كتاب تاريخي على كل مؤرخ كتابة هامش عن مصدر المعلومة إلا لو فقرة تحليلية أو لو أحداث تاريخية معروفة للجميع.
  • القوانين الرسمية : يمكن الاطلاع عليها في دار الوثائق المصرية لكن بتصريح .
  1. مكاتبات رسمية : متمثلة في أوامر ومكاتبات محمد علي( حكم 40 سنة وتابع كل تفاصيل البلاد بنفسه )
  2. أحكام المحاكم الشرعية ( يتم فيها الحكم بأحكام الفقه الإسلامي ) : جميع وثائق المحكمة دار الوثائق
  3. أحكام المحاكم الحديثة : (قائمة على القانون الوضعي ): القضاة دارسين للحقوق( تم العمل بالمحاكم الشرعية مع المحاكم الحديثة حتى تم نزع اختصاصاتها تدريجيا.
  4. كتب الرحالة الأجانب : مثال للرحالة :المتدينون المسيحيون لزيارة الأماكن المقدسة –المتخصصين في اللغويات الشرقية – رحالة لغرض الاستشفاء

من أهم كتب الرحالة: كتاب عادات وشمائل أهل مصر

  1. مذكرات وسير ذاتية : مثل مذكرات أنور السادات
  2. شهادات وتاريخ شفهي
  3. أدب : روايات وشعر

مثل : روايات صنع الله إبراهيم ( ذات – نجمة أغسطس – إنسان السد العالي )

-إدريس علي (النوبي )

– الطيب صالح ( موسم الهجرة للشمال )

-أحمد فؤاد نجم

– تم أضافة  فيلم ( الناس والنيل  ليوسف شاهين )  و القاهرة 30 لصلاح أبو سيف

ومسلسل ( ليالي الحلمية ) و( زينب والعرش )

  1. أغاني التراث الشعبي ( مثل أغنية يا عزيز عيني )

أنواع التاريخ ( التاريخ الوصفي مقابل التاريخ التحليلي ) :

أولا التاريخ الوصفي : وصف الحدث كما هو دون تحليله.

ثانيا التاريخ التحليلي : طبقات التحليل : فردي – محلي – قومي – أقليمي –دولي.

اقترابات التحليل التاريخي : ماركسي ( من وجهة نظر الطبقات الاجتماعية  المختلفة ) – ليبرالي – ما بعد الكولوني –تحليل الخطاب (وعلاقات السلطة) – دراسات المهمشين.

  • من أهم الاقتراحات التي طرحت خلال هذه الفقرة : قراءة كتاب رجال الباشا لخالد فهمي.

تم مناقشة أحدى فصول كتاب د. زينب ( امبراطوريات متخيلة وثورات المهمشين في صعيد مصر )” ثورة شيوعية في صعيد مصر “.

– دارت المناقشة حول الحكاية التاريخية للنص ونوع التاريخ فيه وطبقات تحليله ومصادره.

في نهاية المحاضرة تم تقسيم أعضاء الورشة الى مجموعات وقامت كل مجموعة بفحص وقراءة بعض الوثائق التي ترجع للقرن التاسع عشر الميلادي ثم تم مناقشة الوثائق ومنها مكاتبات بين محمد علي وأحمد باشا طاهر وأخرى بين محمد علي وابنه وأخرى بينه وبين احد المهندسين.

كلاكيت اليوم الأول :)

لقطات من اليوم الأول :)

الخميس 22 يناير 2015

جزيرة سهيل، النوبة –  اسوان

تصوير ومونتاج: يمني الختام ومحمد دسا

صوت: محمد دسا ويمني الختام ومحمود عاطف

IMG_0421
جدول الأيام الأربعة الأولي من الورشة 
IMG_0424
مانيفستو اللا-مؤرخين
IMG_0422
مكتبة احكي يا تاريخ من كتب المشاركين