ما انتجه المشاركون في ورشة اسكندرية من كوميكس مع لينا مرهج بعد دعبسة وقراية في الارشيف.

يوم السبت ٢٣ ابريل من الساعة ٧ مساءا بدأ الجمهور الاسكندراني وغير الاسكندراني يهل علي وكالة بهنا عشان يشاركنا نتاج دعبستنا في ارشيف الاسكندرية من اواخر القرن ال١٩ لاوائل القرن ال٢٠.

جولة في بهنا كانت بتبدأ بالمعرض اللي كان فيه كل الارشيف اللي كنا بنستخدمه من جرايد ومسرحيات وحكايات اشخاص. المعرض كمان بيضم الخريطة اللي عملناها لاسكندرية وحطينا عليها قصص الشخصيات اللي اترسم حكاياتهم كوميكس والجرايد اللي اتكلمنا عنها واماكن المسارح اللي اتعرض فيها مسرحيات يعقوب صنوع وغيره.

 

وبعدين بتمشي في ممر عشان توصل لقاعة العرض اللي كان فيها عرض مرسحية جوقة احكي يا تاريخ وكان اعلانها هو:

تحفة المراسح في الإسكندرية
لجوقة التياترات العربية

تقدم

أغاني؛ ورسالة جرجي زيدان
أخبار؛ ومرسحية “الدرتان”

الضحك؛ والموضوع راقي
بمشاركة
أجدع اللّعيبة

ليلة السبت ٢٣ أفريل \ نيسان
في مرسح الدكان

احجزوا تذاكركم من الأن قبل نفاذ الكمية
رغم إن التذاكر ببلاش

وكالة بهنا ١ شارع الكنيسة المارونية (سوق الورق)، المنشية

وعشان العدد كان كبير، قام اللعيبة بعرض المسرحية مرتين علي التوالي.